حظك بعد موتك !!!... بقلم : عصام حداد

حظك بعد موتك !!!... بقلم : عصام حداد
مساهمات القراء
بعد عذاب الدنيا وألمها هل يوجد عذاب آخر داخل القبر؟؟؟ لنسمع ماذا حصل لأبو مرزوق بعد دفن ...
سمع أبو مرزوق صراخ وعويل وندب وشوشرة .. فهم بالاستيقاظ وحاول فتح عينيه فلم يرى !! وضغط بيديه ليقوم من السرير فلم تسعفه يداه !!

وحاول أن يدير رقبته فلم تعينه !! فأراد الكلام والصراخ لكن لا صدى لصداه فحنجرته ولسانه خذلاه .. وظن أن الكهرباء مقطوعة كالعادة فكل ما حوله ظلام ساده .. فقال في نفسه ماذا جرى وأين أنا ولما هذا الصراخ والعويل هل أنا في منام أم هو كابوس ثقيل .. واحتار وفكر بكل شيء لكنه لم يدرك أن الكهرباء انقطعت عنه هذه المرة من غير رجعة وأن عزرائيل سحب الباشون وشهادة السوق بأمر من فوق !! ومضت برهة من الهدوء التام والظلام .. حتى سمع أحدهم يقول : الله يرحموا العمر إلكون !!! وعاد الصراخ والعويل مجددا واستغرب أكثر وحاول مرارا النهوض والجلوس لكنه عاد ليقول أكيد أنا في كابوس .. لكنه ارتعد عندما سمع زوجته تصرخ وتقول الله يرحمك يا أبو مرزوق حينها علم أنه لن يرى بعد اليوم الشروق .. وقد حانت ساعته وانتهت صلاحيته .. وبعد أن سمع نزوله وأدرك دفنه هيأ نفسه .. فهو يعرف أنه سيأتي أنكر ونكير ويخضع لتحقيق كبير !! وأحس بهدوء وسكون لم يعرفه طوال عمره المحزون .. وبينما وهو غارق بالتفكير يذاكر ما لقنه إياه شيخ الطريقة والتدبير .. وإذا بضيفان يدخلان عليه من اليمين والشمال أحدهم مهندم بكفن جخ وكرافيت ساتان والآخر معتر يلف كفنه كيفما كان .. فقال أحدهم للآخر صاحبك جديد ومانو عرفان شي .. فخاف أبو مرزوق وقال : شوماني عرفان شي .. الله ربي ومحمد نبيي ووو... فضحك الإثنان عليه وقالوا له طول بالك ولا تخاف نحنا مو أنكر ونكير نحنا جيرانك هون أنا تعسان البرقوق وهدا المعلم فرحان الحربوق ..
فقال أبو مرزوق : واضح واضح يا برقوق .. ومحسوبكن المتوفي حديثا أبو مرزوق ..
تعسان : شو قديش صرلك هون ..
أجاب ابو مرزوق: والله شي يومين تلاته يمكن ..
تعسان : حققو معك ولا لسا ؟
ابو مرزوق : لأ ما شفت حدا غيركون أهلين بجيران الرضى ؟
تعسان : والله لساك شب يا زلمة .. على كل حال لا يهمك بس ينتهي التحقيق معك منرجع وألله يعينك .. خاطرك ..
وبعد شوي سمع أبو مرزوق حركة وإذ بأشخاص يتقدمون نحوه أحدهم يحمل بيل بيده لإضاءة المكان .. وعندما اقتربوا منه قال : مين أنكر ونكير ؟!
فقالو له : لا خيو اشو مانك شايفنا متلنا متلك .. نحنا شرطة دفن الموتى وجايين نسألك كم سؤال ..
ابو مرزوق : كمان هون في شرطة وتحقيق ؟
الشرطي : يضحك طبعا يا أبو مرزوق لكن شو مفكر الآخرة شوربة .. هات لشوف احكيلنا .. من أين لك هذا ..؟؟؟
أبو مرزوق : اي فوق ما حدا سألني هالسؤال بعدين شو هذا ما هذا ولله ما معي غير هالكفن ..
الشرطي : لاتخلينا نزعل منك .. نحنا عم نسألك عن هالقبر الجخ يللي دفنوك فيه كيف حصلت عليه ..؟
أبو مرزوق : اشتريتو بمئة ألف من حر مالي وكيلكون الله .. فاستغربوا وصرخ احدهم مئة ألف العمى أشو هادا عم يضحك علينا كل هالمدة ويلعب من ورانا ويقلنا عم يبيع القبر بعشرتالاف ...
الشرطي : لمين عطيت المصاري ياأبو مرزوق ..؟
أبو مرزوق : عطيتون لواحد اسمو ...... ايه أبو جابر سيدي لأنو هو المسؤول فوق ..
الشرطي : أبو جابر النصاب أشو عليه بسيطة روح خيو (قال لرفيقه) وذهبوا مسرعين ...
وأبو مرزوق مو عرفان شي بس قال لحالو أووخ خ الحمد لله لافي عصي ولا ضرب .. وبعد شوي انتبه أبو مرزوق انو في تنين واقفين بالعتمة ودايرين ضهرون عليه وكأنون كانو عم يتنصتوا عالحديث .. وبعد ماراحو الجماعة التفتو وسألوا : شو مية ما مية ابو مرزوق ..؟
جاوب أبو مرزوق وهو خايف : مافي شي شباب عم نمزح مع بعض .. بس مين حضرتكون كمان ؟
فقالوا له : ماعرفتنا .. نحنا جنائية آخر نزله .. !!!
أبو مرزوق : خير انشاء الله أي نزله منهون ؟! نزلة المهاجرين ..؟
الجنائية : شبنا أبو مرزوق .... نزلتك هون شو نسيان إنك مدفون عنا ..!
أبو مرزوق : لاوالله أهلين أهلين بالشباب الله يلعن هالنزلة شو مكركبة ..؟
الجنائية : لاتخاف مافي شي شوية معلومات عن جارك تعسان وفرحان .. يعني حشيش ماحشيش مخدرات نسوان شو بتعرف .. حكي بالحسنى ...
أبو مرزوق : والله مابعرف شي دخلوا لعندي وسلموعليي وعرفوني بحالون وسألوني خلص التحقيق معك وقالولي بس يخلص منرجع لعندك وأنا مابعرف عنون شي أبدا...
الجنائية : طيب انت شو يللي موتك ؟
ابو مرزوق : والله ياسيدي موتة ربي خلص عمري ..
الجنائية : يعني مابتشك بحدا .. ومرتك مالها علاقك بموتك ..؟؟!!
أبو مرزوق : أبدا سيدي والله كانت عم تبكي مقهورة عليي .. ويا سيدي من الفقر والتعتير بيخلص العمر على بكير..
الجنائية : فقر وتعتير وقاعد بقبر حقو مئة ألف اي مو ظابطه أبو مرزوق ...... فتشوه لشوف ....
العنصر بعد التفتيش : مامعو شي سيدي ..
الجنائية : طيب يا أبو مرزوق إذا سمعت شي هيك ولا هيك خبرنا انت من الأموات الشرفاء ونحنا منعرفك فلا تخلينا نغير رأينا فيك ..
أبو مرزوق : أمركون سيدي تكرم عيونكون ...
وبعد شوي سمع عجقة وبنجكتورات وغبرة وبلش خبط بواب السيارات وتقدموا نحوه أشخاص بينهم شخص مطقم أنيق يضع نظارات سوداء .. وركض أحدهم وضرب الأرض برجله هزت المقبرة كلها وقال : تمام سيدي .. فتقدم المعلم وهو بكامل أناقتو أمام أبو مرزوق يتفحصه من فوق لتحت .. حس أبو مرزوق وبلش يرجف رغم انو ميت !!! وقال لحالو أكيد هدول مو أنكر ونكير وكأني شايفون بزماني .. وعمل حالو نايم !!! آم صرخ المعلم : فتشو ولا .. والشباب بدون هيك كلمة ألله وكيلكون نكوشوه نكوشة لأبو مرزوق .. وهزت المقبرة مرة تانية كأنو زلزال وسمع أبو مرزوق صوت شي ألف واط عم بقول : تمام سيدي مافي غير شوية قطن .. فقال المعلم : باين عليه فقير .. فيقو ولا فيقو .. فركله أحدهم برجله بكل احترام وقال له : قوم ولك حيوان العمى فعيونك صرلنا يومين عم ندور عليك وما تركنا مقبرة للفقرا إلا نكوشناها وانت مكيف هون بين هالشجر والفي والمي ..
استيقظ أبو مرزوق مرعوب وقال لهم : مين انتو أنكر ونكير؟
فرد عليه المعلم بعد أن ضحك وقال : أنكر و نكير لأ ولاد عمون .. قوم ولا وداعبه برجله مداعبة الأخ لأخيه والصديق لصديقه .. قوم نحنا فرع الآخرة يا فاخرة !!! هات وراقك ولا .. فأعطاهم أبو عبدو ميكانيك الجثة يعني ورقة الطبيب الشرعي .. فنظر المعلم اليها وقال : قلتلي دفعت حق القبر مئة ألف ؟؟ ولك ماعد تعرفوا انتو الفقرا تنقبروا إلا بالمناطق الراقية ولا .. ولاّ نجها ماعد تعجبكون .. بسيطة وهز برأسه !!
فقال أبو مرزوق : والله يا سيدي من زمان اشتريت هالقبر وتركتو لآخرتي حتى المقابر صار فيها غني وفقير ؟ أنا يا سيدي بعرف انو الميت ماحدا دخلو فيه وما بيشوف إلا أنكر ونكير وأنا لهلق ماشفتون ...
فأجاب المعلم : ولك أنكر ونكير عنا بالفرع عم نتحقق معون من شي سنة بتهمة الرشوة وإقلاق راحة الموتى شو ما بتعرف ولا ..؟
أبو مرزوق : لاوالله يا سيدي بس بعرف انو هدول عاقلين ومالهون مشكلة أبدا ...
أحد العناصر : مالهون مشكلة .. هات لشوف شو بتعرف عنون وشو علاقتك فيهون ووين اجتمعتوا ؟؟!!
أبو مرزوق : والله ياسيدي بعمر ماشفتون وما بعرفون ..
العنصر : لكن سكوت وبلا فزلكة ..
فسأله المعلم : ليك ولا في واحد كان واقف على دفنك وكان عم يسب ويشتم وأكيد انت بتعرفوا وسمعتوا وكنت مبسوط .. شو اسمو ولا ؟؟
ابو مرزوق : والله يا سيدي ماكنت مكيف و لا شي لأنون خبطولي راسي وهنن عم ينزلوني ويمكن غمى عليي وما سمعت شي ..
المعلم : لاتلف و تدور ولا أبو مرزوق .. لف رجليه بهالكفن لقلك تشوف ...
أبو مرزوق : لا لا سيدي بعرضك هادا واحد فقير ومعتر وكان عم بيقول يلعن أبو هالعيشة الواحد بعيش فقير وبموت طقيق ...
المعلم : وانت متت طقيق يا أبو مرزوق ؟؟؟؟؟؟؟
أبو مرزوق : لا سيدي لا .. صحيح كنت جوعان وما عندي أكل لتاني يوم لو عشت .. وما في بجيبتي فرنك بس كنت مبسوط وعم بدعيلكون ليل نهار الله يخليلنا ياكون ياسيدي ..
هز المعلم براسو وقال : شكرا أبو مرزوق نحنا هيك منعرفك انت متوفي صالح وآدمي ـ شو قلتللي اسم يللي كان عم يشتم ...
أبو مرزوق فورا : أبو عدنان سيدي والله أبو عدنان أنا مادخلني .. وماحكيت شي !!!
المعلم : لو فيك تحكي كنت حكيت .. على كل الأحوال مانو مطول هالأبوعدنان بس ينزل لعنّا منتحاسب بس كان لازم تخبرنا عنو فورا مو تساوي حالك نايم أول ما أجينا .. هون مافي نوم .. لهيك مضطر نزلك لأسفل السافلين شوي باأبو مرزوق ...
أبو مرزوق : طول بالك سيدي وروق شوي .. والله مادخلني بعدين شو هي أسفل السافلين ؟؟؟
المعلم : بس تنزل بتعرف .. ماخبرتنا شلونو صديقك تعسان ؟
أبو مرزوق : والله يا سيدي هدول أصدقائي وجيراني تعسان وفرحان اجو لعندي ووو...
فقاطعه المعلم و قال مستغربا : تعسان ومين ؟؟
أجاب أبو مرزوق : فرحان سيدي فرحان أبو كرافيت ساتان ...
المعلم ينظر الى ابو مرزوق بدهشة ويقول : ليش المعلم فرحان صديقك وجارك هون ..
أبو مرزوق : والله سيدي ي ي أأأ ....
فضحك المعلم وخفف اللهجة القاسية وقال : ولك ليش ماقلتنا أنو فرحان جارك وصديقك كنا ماحققنا معك ولاتعذبنا ولك هادا المعلم فرحان معلمنا كلنا بس تشوفو سللملنا عليه كتير فهمت .. امشو شباب امشو لاتواخذنا يا أبو مرزوق نحنا بس حبينا ندردش معك ونسليك شوي !!!
والله طلع هالأبو مرزوق مرزوق .. وإلا كان أكلها دنيا وآخرة ..
وعند المسا طلع أبو مرزوق لفوق بعد ما ندهولو وقعد عالحشيش هو وصحابه تعسان وفرحان وكل والشباب الميته ( عكس الطيبة ) وكل واحد حامل صفط الأكل تبعوا .. أما المعلم فرحان كانوا جايبينلو جماعتو صفطين حلويات داوود ونفيسة يللي بالكون منها !! وبعد الحلويات حطوا هالأراكيل وصبو هالمتة وغلو إبريق الشاي على الحطب وأحلى قعدة للشباب تحت الشجر وبلشت العتابة والميجنا .. بس انتزع مراق الشباب لأنون سمعوا صوت صريخ بعيد من تحت الأرض وتذكر أبو مرزوق أسفل السافلين !!! ياسيدي ندعوا الله أن يرزقنا متل أبو مرزوق بالآخرة ويكون شي فرحان تاني جارنا !!!

http://www.syria-news.com/readnews.php?sy_seq=71043